Breiziloù 2020

Le jou-la taet un samedi. La pllée cheyaet a pllein temp. Les qeniaos taent o lo joueries su l’ordrinoué. Je lou demandis :
– V’alez-ti vni cantë mai vair les sonous a Loudia ?
I taent d’assent. Qand j’arivite faillë amontrer ses poqes. I nous clichitent un failli copia d’iao a la goutte pour tosser la pouézon e j’alime nous siétë , més pas prés a prés : ben de trop gandilleux. Je taent un bon coupl de cent dans l’ôté. Des garçailles de toute la Bertagn, de Pont-Labbé, Fouesnant dica La Turballe !
Den la permiére souéte i taent catr, deûz couéffes et deûz bourjoués. En pus de soner, i nous amontritent lo muziqe, coment-ce q’i va le ptit machin-la.
Pour fére la liure, un pai bllanc nous préchit eune conterie oyou q’i taet mention d’un paisson massacr qe le péchou s’n’allit eûfri ao rouai.
Le trio des cllos suéyaet, derouine, tronc d’chou et bouéze. Dame garne, les touez-la ont du beughon pus q’i n’en faot !
Je chantite, je dansite, (su pllace, faot demeurer saije…) je tapite dan nos poques.
I nous aprimes coment erconaitr son pied dret de son pied gaoche. Aizë. Le gaoche a le gros det a drete. Du het ! Les qeniaos rigolaent a goule démaçonée.
N’en fut d’eune belle véprée. Les siens de Kenleur se sont cor ben en chevi de l’afére-la.
En vaila q’éme mieûz fére qe de dire.